Нарбол Қашаған, «Talas tynysy».
Көктал ауылдық округі тұрғындарымен кездескен аудан әкімі Нұрбол Жүнісбеков көпшілік тарапынан туындаған сауалдарға жауап беріп, алда тұрған міндеттерді таныстырды.
Мұнан соң аудан әкімі балалар өнер мектебінде қала тұрғындарымен кездесті. Мекеме басшылары, аудандық мәслихаттың депутаттары және жергілікті тұрғындар бас қосқан жиында сөз алған қала әкімі Дархан Баймбетов биылғы жылдың 5 айында атқарылған жұмыстарды баяндап берді.
-Бүгінге дейін қала көлемінде 13 көшеге жөндеу жұмыстары жүргізілді. Әлі де шағын шаһарымызда 31 көше жөндеуді қажет етеді. «Моноқалаларды дамыту» бағдарламасы аясында аталған көшелерді 2027 жылға дейін аяқтап біту жоспарда бар.
Жыл басынан бері 3 мөлтек ауданындағы №75, Ә.Ақшораев көшесі 1 үйдің ауласына ойын алаңшасы және стрит воркаут алаңын, ал Б.Момышұлы №9 үйдің ауласына ойын алаңшасы және резіңке жабындысы төселді. Қазіргі таңда қаланың «городок» аталып кеткен аймағы мен темір жол иінінің арғы бетінде жеке сектор аумағында көшелерге жарықтар орнатылып, ойын алаңшасының құрылысы жүріп жатыр,-деген Дархан Тобашұлы алдағы уақытта қолға алынатын жұмыстарға тоқталды.
Қала әкімінің сөзінше, тұрғындардың талап-тілегі бойынша жөндеу жұмыстары жасалып жатқан «Ақжелкен» бассейні шілде айының басында пайдалануға берілмек. Жазғы демалыс орнына кіру бағасы қолжетімді болмақ. Отбасыларының әлеуметтік жағдайы да ескерілген.
Мұнан соң жарыссөзге шыққан Ш.Уәлиханов атындағы орта мектебі директорының шаруашылық ісі жөніндегі орынбасары Болат Ахметов, еңбек ардагері Молдияр Мырзахметов, ауданның Құрметті азаматы Базылхан Тоқтыбаев тұрғындар тілегінің ескеріліп жатқанын алға тартып, жасалып жатқан жұмыстарға оң бағасын берді.
Жиын соңында тұрғындар тарапынан қойылған сауалдарға жауап берген Нұрбол Жүнісбеков: -Алда атқаратын жұмыс көп. Барлығы елдің игілігі мен қаланы көркейтуге арналады. Мәселен, қалаға кіре беріс «Рухани жаңғыру» аллеясына жөндеу жұмыстарын жүргізу жоспарда бар. Алайда жөндеу жұмыстарына жұмсалатын қаражат та аз болмай тұр. Сонымен қатар, биылғы жылы Б.Момышұлы көшесінен бір көппәтерлі үйді қалпына келтірмекпіз. Жаңғыртудан өткен тұрғын үй пәтер кезегінде тұрған азаматтарға беріледі. Қазір «Игілік» көпсалалы кәсіпорнының қазандығын жөндеп жатырмыз. Нысан 2013 жылғы қатты дауылдан кейін жөндеу көрген жоқ. Тағы бір жағымды жаңалық аудандық орталық аурухана жанынан қосымша ғимарат соғылады. Яғни ауданаралық көпбейінді аурухана құрылысы басталмақ. Жобалық-сметалық құжаттары әзір. Мұнда Сарысу мен Талас ауданының тұрғындары ем қабылдайтын болады,-деді.
Жиынды қорытындылаған Нұрбол Әбдімәжитұлы республика көлемінде қолға алынған экологиялық акция аясында қаланы абаттаныдру, көріктендіру және көгеріштендіруге белсене атсалысқан азаматтарға Алғыс хат пен арнайы сыйлықтарды табыс етті.
