Қазақстанда әлеуметтік, көлік және инженерлік инфрақұрылымды жаңғыртуға бағытталған ауқымды құрылыс бағдарламасы жүзеге асырылмақ. 2029 жылдың соңына дейін бұл мақсатқа Ұлттық қордан шамамен 6,5 трлн теңге бөлу көзделген. Бастама Қазақстан халқына арналған Жолдауда жарияланды.
«Халықтық құрылыс» бағдарламасы елдегі инфрақұрылымдық мәселелерді шешуге, жаңа әлеуметтік нысандар салуға және өңірлердің даму қарқынын арттыруға бағытталған. Оның алғашқы кезеңінде 2026 жылы және 2027 жылдың алғашқы екі айында әлеуметтік жобаларға 1,5 трлн теңге қарастырылған.
Жоспар аясында денсаулық сақтау саласында 70-ке жуық нысан, ал білім беру, спорт және мәдениет бағыттарында 50 нысан салу көзделіп отыр. Сонымен қатар тұрғын үй құрылысы, көлік инфрақұрылымы мен коммуналдық шаруашылықты дамыту, халықтың ауызсу және газға қолжетімділігін арттыру міндеттері белгіленген.
Инфрақұрылымдық жобаларды іске асыру жаңа жұмыс орындарын ашуға да мүмкіндік береді. Бағдарлама жүздеген мың адамды жұмыспен қамтуға ықпал етеді деп күтілуде. Бұл құрылыс саласының дамуына серпін беріп қана қоймай, өңірлердегі экономикалық белсенділікті арттыруға жол ашады.
Мемлекет басшысы инфрақұрылымды жаңғырту жұмыстары елдің барлық өңірінде жүргізіліп, азаматтардың өмір сүру сапасын жақсартуға бағытталуы қажеттігін атап өтті. Сондай-ақ 2027 жылды Жалпыұлттық ауқымды құрылыс жылы деп жариялау ұсынылды.
Алдағы жылдары жаңа нысандардың салынуы мен инженерлік желілердің жаңаруы елді мекендердің дамуына, әлеуметтік қызметтердің қолжетімділігіне және халықтың тұрмыс жағдайының жақсаруына ықпал етпек.