Нарбол ҚАШАҒАН, «TALAS tynysy».
Есейхан ауылына кіре беріс жол жергілікті тұрғындар тарапынан көтерілген басты мәселесінің бірі еді. Тозығы жеткен жол ауылдан қатынағандар үшін айтарлықтай қиындық тудыратын. Әсіресе, көптен жөндеу көрмеген жолда қыс пен күз мезгіліне қауіптілік тіптен арта түсетін. Көпшілікті де алаңдататыны осы мәселе.
Көпке ортақ түйткіл оң шешімін тапты. Есейхан ауылына кіре беріс 10,3 шақырымды құрайтын жолға мамыр айынан бері жөндеу жұмыстары жүргізіліп жатыр. Облыстық және аудандық бюджеттен тиісті қаражат бөлінген. Құрылыс жұмыстары қазіргі таңда аяқталуға жақын.
— Бүгінде қажетті жұмыстардың 80 пайыздан астамы орындалды. Яғни дренаждық каналдар жасалып, құм-қиыршық тас төгіліп, асфальт жабындысы төселуде. Құрылысқа жауапты «Қаратау жолдары» ЖШС (директоры Н.Бекбердиев). Ал, нысанға техникалық қадағалау жүргізетін «Стройсервис КНК» ЖШС. Жөндеу жұмыстарын аяқтау қазан айына жоспарланған, — дейді Қаратау ауылдық округінің әкімі Мұрат Несіпбаев.
