2021 жылы Жамбыл облысында осы өңірден шығып, бүгінде түрлі салада жетістікке жеткен танымал түлектерді жастарға таныту және үлгі ету мақсатында «Жомарт түлек» жобасы қолға алынған болатын.
Жобаның негізгі мақсаты да осы туған өлкесінің әлеуметтік мәселелерін шешу үшін демеушілік көрсетіп, мектептің материалдық базасын жақсартуға өз үлестерін қосу. Жоба бастау алған күннен бүгінге дейін көптеген игілікті істер атқарылды.
Осындай игілікті істің бірі Шоқан Уәлиханов атындағы орта мектебінде жалғасын тапты. Білім ошағын 1999 жылы бітірген түлектер Ғалымжан Тоқмырзаев пен Әділет Молдабековтің жеке демеушілігімен мектеп ғимаратының алдыңғы жақтауына заманауи үлгіде, түнде жарық беріп тұратын мектептің атауын жаздырылды.
Патриоттық сезімнің үздік үлгісі — туған жеріне, мәдениеті мен дәстүріне деген құрмет көрсету. Әрбір азаматтың өмірінде табысқа жетуі мектеп пен мектеп мұғалімдерінің еңбегі екені белгілі.
Сол себепті түлектеріміздің алтын ұя мектептерін естен шығармай, барынша көмек көрсетіп жатқандығы көңіл қуантады. Түлектерімізге мың алғыс! «Жақсы сөз – жарым ырыс» дейді халқымыз. Ұрпағын жақсылық пен қайырымдылық жасауға, бір-біріне мейірімді болуға тәрбиелген ата – аналарыңызға мың алғыс.
Сіздерге мектеп ұжымы атынан үлкен алғысымызды білдіреміз. Әлемде сіздер сияқты мейірімді, ақкөңіл және жанашыр адамдар аз. Өйткені, мұндай адамдар басқаларға үміт пен жанқиярлық көмек береді, мұндай адамдар басқаларды күшті және мейірімді етеді. Рамазан айында жасаған жақсылықтарыңыз, еселеніп қайтып, өмірдегі барлық армандарыңыз бен амандығыңызды жүзеге асырсын.
Қуат Қынаша,
Ш.Уәлиханов атындағы орта мектебі директорының орынбасары.
