Ұлттық домбыра күні 2018 жылдан бері елімізде дәстүрлі түрде тойланып келе жатқан ерекше мереке. Бұл мерекенің аясы жыл санап кеңейіп келеді. Бүгінде ұлттық өнерге бет бұрған жастардың да қатары көбейгендігі көңіл қуантады. Себебі, ұлттық аспабымыз домбыраны ұлықтау- тұтас халқымыздың болмысын, тарихы мен салт- дәстүрін ұлықтау, қайта жаңғырту.
Ұлттық домбыра күні қарсаңында ауданда арнайы челендж ұйымдастырылып оған Қаратау қаласындағы Балалар өнер мектебінің жас өнерпаздары, аудандық «Жастар ресурстық орталығының» белсенді жастары мен бірқатар мекеме қызметкерлері де атсалысып, аймақты күмбірлеген күйге бөледі. Жастарға домбыраның киесі мен күй құдіретін жеткізіп, қасиетті қара домбыраны ұлықтау мақсатында Қаратау қаласында өткен бірқатар шараларға аудан тұрғындары куә болды.
Салтанатты мерекеде Ұлбике ақын атындағы мәдениет орталығының өнерпаздары мен аталмыш мәдениет орталығына қарасты ауылдық мәдениет үйлерінің әртістерінің ұйымдастырған концерттік бағдарламасы аудан тұрғындары мен қонақтарына рухани кеш сыйлады. Қазақтың қара домбырасында күмбірлеген күй мен ұлттық нақыштағы әндер шаһар аспанында әуеледі.
Арайлым Әбсадықова,
Ұлбике ақын атындағы мәдениет орталығының әдістемелік бөлім меңгерушісі.
