Тың бастамаларға тұсау болып, елдің экономикалық дамуына кері әсер ететін қоғамның өзекті мәселесінің бірі – сыбайлас жемқорлық. Қоғамдағы осы кеселдің көріністері мен туындау себеп -салдарын жоймай, оны азайту мүмкін емес. Бұл ретте заңнамалық реформалар мен мемлекеттік органдардың реформалары жүзеге асырылуда. Мемлекет басшысы Қасым-Жомарт Кемелұлы Тоқаевтың 2022 жылдың 2 ақпанындағы №802 жарлығымен «Қазақстан Республикасының 2022-2026 жылдарға арналған сыбайлас жемқорлыққа қарсы саясатының тұжырымдамасы» бекітілді. Онда сыбайлас жемқорлықтың алдын алуға бағытталған тіректі ұғымдар айқындалған.
Президент өз сөзінде: «Жемқорлықпен күреске бүкіл қоғамды жұмылдыру керек. «Жемқорлық – індет, онымен күресу – міндет» деген қағиданы жұрт санасына орнықтыру – барлық мемлекеттік органның ортақ жұмысы. Бұған бір реттік науқан ретінде қарамау керек», – деп атап өткен болатын.
Сыбайлас жемқорлыққа қарсы іс-қимылды заман талабының әдістерін қолдану арқылы күшейту – баршамызға ортақ міндет. Сыбайлас жемқорлықтан берік иммунитеті бар азаматтардың жаңа буынын қалыптастыру – әрбір азаматтың ең алдымен ар алдындағы жауапкершілігі. Жалпы сыбайлас жемқорлыққа қарсы кез — келген шараға бей-жай қарауға болмайды. Өйткені, біз оған қарсы шараларды ұйымдастыру арқылы қоғамның иммунитетін қалыптастыруға қол жеткіземіз.
Елімізде мемлекеттік қызметкерлер заңнан аттамайтын, халықтың құқықтық сауатсыздығын жоятын шаралар мен сапалы түсіндіру жұмыстарын жиі ұйымдастырған жөн. Тұрғындар өз құқығын, өздеріне қарсы қандай да бір құқыққа қайшы іс-әрекет жасалған жағдайда нендей іс-қимыл қолдану керектігінің нақты жолдарын толық білулері қажет. Себебі, өзінің конституциялық құқығын дұрыс білмейтін адам қиындықтарды шешу жолдарын да білмейтіні анық.
Жалпы, жеке адамның құқығы, мүмкіндігі мен жауапкершілігі – жастайынан санасына құйылғаны абзал. Бұл өсе келе жақсы мен жаманды ажыратып, заңсыз іс-әрекетке жол бермеуіне сеп болады. Өйткені, тал бесіктен берілген білім әрбір саналы адамға өмірлік бағдар болары һақ.
Қорыта айтқанда, сыбайлас жемқорлықсыз, Әділетті Қазақстанды құру үшін әрбір қазақстандық Мемлекет басшысы айтқан «Адал адам» ұғымына сай болу керек. Ал, адал азамат дегеніміз – жақсы қасиеттерге ие, адал еңбек ететін және табысқа адал жолмен жететін жан. Адалдық пен әділдікті бәрінен биік қойып, жаңа құндылықтар орныққанда ғана мінсіз қоғам орнамақ! Бұл межеге жетуміз үшін жемқорлықпен күреске бүкіл қоғам болып жұмылуымыз керек.
Нұрбол Жүнісбеков,
Талас ауданының әкімі.
