Қазақстан Республикасы Президентінің 2024 жылғы 2 қыркүйектегі №636 Жарлығымен 2024 жылдың 6 қазанына республикалық референдумды өткізу тағайындалуына орай, Жамбыл облыстық аумақтық референдум комиссиясының ұйымдастырумен аумақтық және учаскелік референдум комиссиялары мүшелерінің біліктілігін арттыруға арналған семинар-тренинг өткізілуде.
«Республикалық референдумды даярлау мен өткізудің ұйымдастырушылық аспектілері» тақырыбында комиссия мүшелерінің кәсіби біліктілігі мен құқықтық мәдениетін арттыруға бағытталған оқыту семинары Қаратау қаласындағы балалар өнер мектебінде ұйымдастырылды. Семинар-тренингке Талас ауданы бойынша аумақтық референдум комиссиясының мүшелері мен учаскелік референдум комиссияларының толық құрамы, сондай-ақ жергілікті атқарушы органның референдум процесіне қатысты өкілдері, тиісті бөлім басшылары мен бұқаралық ақпарат құралдарының өкілдері қатысты.
Семинар-тренингтің мақсаты – Республикалық референдум туралы заңнамадағы жаңашылдықтар туралы, сайлау заңнамасының негіздерін және оны сайлау процесінде қолдану практикасын түсіндіру және референдумды ұйымдастырушылардың кәсіби құзыреттерінің деңгейін арттыру болып табылады.
Оқу-семинарын Жамбыл облыстық аумақтық референдум комиссиясы төрағасының орынбасары Т.Жамалов ашып, қатысушыларды семинардың бағдарламасымен таныстырды. Оқу-семинарының жоспарының негізінде Т.Жамалов республикалық референдумды өткiзудiң принциптерiне тоқталса, облыстық аумақтық референдум комиссиясының мүшелері саяси науқанды әзірлеу мен өткізу кезеңіндегі жұмыстар мен дауыс беру тәртібі жөнінде дәрістер оқыды. Сонымен қатар, семинарда баяндама жасаған аудандық аумақтық референдум комиссиясының төрағасы Е.Мамадияров учаскелік референдум комиссия мүшелерінің күнтізбелік жоспарда көрсетілген барлық іс-шараларды белгіленген мерзімдерге сәйкес жүргізілуін қамтамасыз етіп, қолданыстағы заңнаманы қатаң сақтауға тиіс екенін атап өтті. Оқыту барысында учаскелік референдум комиссияларының мүшелері дәріскерлерге науқанда орын алатын жағдайлар бойынша бірқатар сұрақтар қойып, кейстік тапсырмалар талқыланды.
Учаскелік референдум комиссиялары мүшелерінен оқытуға кіргенде және оқытудың қорытындысы бойынша тест алынып, сертификаттар табысталды.
Серік Қуанышбаев,
Талас аудандық аумақтық референдум комиссиясының хатшысы.
